MIZORAM A VISHAL LO IN BUN CHUNGCHANG HI NGUN TAK A NGAIHTUAH A NGAI

  Vawiin 27th March 2017 (Thawhtan) khan MZP executive meeting MZP Pisapui-ah neih a ni a, meeting hi Pu Lalsangzuala Ngente President in a kaihruai a, Meetingah hian Aizawl-a Vishal Mega Mart hawn tum mek chungchang rel a ni.

Hnam dang sumdawng mahni rama luhtir chungchang hi khawvel ram hrang hrangte’n uluk taka an ngaihtuah thin a nih a, thatpui theih a nih rualin chhiatpui theih pawh a ni tih a hria a. MZP pawhin Zofate tan a tul tih hriain Vishal Mega Mart Mizorama hawn tum chungchang hi a phak ang tawkin a thlir a, mipui leh thuneitute pawh he thil hi ngun taka ngaihtuah turin kan a ngen a ni.

Vishal Mega Mart te ang chi chain store-te hian metro city ni lo mihring tam lohna khuaah nghawng tha lo an nei thei a, tual chhung sumdawnna an tihchhiatsak avangin an khuaah sum leng vak a tlem phah a, economy-ah nghawng tha lo a nei thei. Ram changkang zawkah pawh hetiang dawr dodaltu leh sawiseltu an awm thin. Mizoramah rawn lut se engtiangin nge min nghawng ang tih hi ngun taka ngaihtuah a ngai tih hi MZP ngaihdan a ni. Chu chu thil man tlawm dodalna a ni lo.

Mizoramah hnam dang sumdawng an rawn inbun thei em tih leh kan dan neih laite hi a him em tih MZP-in Mizoram sorkar hruaitute a zawt a, mipui leh pawl hrang hrangte pawh he thil hi ngun taka ngaihtuah turin a ngen a ni.

Vishal Mega Mart hian dan leh thil kalphung an zawm em tih pawh ngaihtuah a ngai. AMC Licensing Regulation hmanga sumdawn phalna, August ni 24, 2016-a issue-ah Vishal Mega Mart neitu hmingah  Mizopa hming a chuang tlat mai a, he Licensing Regulation hi 2015-ah Mizorama tlawmngai pawlte’n tangrualin siamthat an lo ngiat tawh, an hlawhchhamna kha a ni. Nikum August thlaah license an hmuh tawh laiin dawr hawn dawn tep, mipui an inhnial hnu leh dodal an awm hnu March ni 23, 2017-ah Vishal lam leh license neitu Mizo te’n Franchisee Agreement an siam leh chauh. Franchise agreement siam a niha franchisee Mizo a nih chuan Mizovin man chawiin Vishal hming hawhin dawr a hawng dawn tihna a ni a, chu chu an indawrna hmasa tur ni awm tak a nih laiin sawisel an awm hnuah an siam chauh si a ni. Chu agreement awm hma chuan a neitu hmingah Mizo hming a lo awm tawh tlat bawk. Chu agreement chu Haryana Non-Judicial Stamp hmanga tih a ni a, Mizoram lam a lan loh bakah Franchisor tur Mizopa phone number chu 9999999999 a ni mauh mai. He agreement phuahchawpah hian witness an awm lo a, notarial registration number a awm lo a, stamp duty pek a ni lo a, he agreement hi danin a phut anga register a ni hek lo. He inremna ah hian he Mart-a thawkte’n (mizo thalaite pawh huam vekin) thubuai hlabuai an neihin Gurgaon, Haryana-ah kher ngaihtuah a ngai tur hian Vishal Mega Mart-a thuneitu chu Mizo ni lovin hnam dang an nihzia a tilang. Hetiang  inremna lem ni ngei hmanga Vishal Mega Mart ten dawr hawn an rawn tum hian Mizote tana an him loh zia ti lang tu pakhat an ni.

Tin, a pawimawh ber laia mi thenkhatin an ngaih VAT registration chu Airplaza Retail Holdings Pvt Ltd (hnam dang ta) hminga tih a ni leh daih a, Mizoram mipuiin kan huat em em, Mizo hminga hnam dang sumdawnna laka kan him theih nan chu’ng thil hrang hrangte chu enfiaha sawifiah tur leh a rintlak em tih ngaihtuah turin MZP chuan thuneitute a ngen a ni.

Airplaza neitute hian kum hnih daih tur ILP a neih vanga registration hi ti thei a ni a, ILP pek a nih dan pawh sawifiah turin MZP chuan thuneitute a beisei a, ILP hian min la chhan em tih thlenga ngaihtuah thamah MZP chuan a ngai a ni.

He thilah hian thil man to vang harsatna mipuiin kan tuar nasa tih leh cost of living a san avangin mipuiin rit kan ti tih a lang a, consumer-te venna te, price control leh inflation lamte Mizoram sorkarin a ngaihthah vanga mipuite tawrhnaah MZP chuan a ngai. Chuvangin hetiang thilte ngai pawimawha mipuite tana theihtawp chhuah turin Mizoram sorkar kan phut a, chutih rual chuan kan sumdawngte pawh an chungah mipui an lungawi lo tih hriaa insiamthatna kawng dap turin kan phut bawk.

Sumdawnna khawvelin min chim deuh deuh dawn a, chutah chuan kan hnam himna tur ngaihtuah tlat turin MZP chuan Zofate a ngen a, ram hruaitute pawh heti lam hi veia ngaihtuah turin a ngen bawk. Hnam dang nena kan sumdawn honaah a ram neitute hi a chan chhe zawka kan tang ang tih hi thil hlauhawm a ni tih hi ram leh hnam humhalh turin i hre reng ang u.

(NANGSAWMTHANGA)
Secretary I/c Publicity MZP GHQ