Zophai ram Bairabi khuaah ‘Zofate chawlhbuk’ sak tum a ni.

DSC_0293 DSC_0298MZP bultumin Zophai ram Bairabi khua-a Pu Ch. Chhunga(L) Ex-Chief Minister Mizoram huan/leilet-ah a nupui Pi Lalrothangi Soran veng Aizawl in sa tura phalna min pek angin ‘Zofate chawlhbuk’ sak tum a ni a. Zofate chawlhbuk sakna tura ram Pi Lalrothangi te chhungin MZP an pek enfiahna leh chhinchhiahna nei turin ni 11th March 2016(zirtawp) khan MZP General Secretary Pu L.Ramdinliana Renthlei ho in MZP hruiatu 9(pakua) te chu Bairabi khuaah hian an kal a. Zirtawp zan khan Bairabi khuaa NGO hrang hrang Villege Council(VC), YMA, MHIP leh MUP te nen Joint meeting neih a ni a, Bairabi khua NGO hrang hrang te chuan MZP bultuma ‘Zofate chawlhbuk’ sak tur chu an thlawp thu leh a sak huna hnatlang tur pawha an inhuam thu an sawi a ni.

Bairabi khua-a Pu Ch. Chhunga(L) Ex-Chief Minister huan/leilet-a ‘Zofate chawlhbuk’ sakna tur hmun hi a ram te enfiah nghal a ni a, a chhinchhiah nan a sakna tur hmun ah hian MZP Flag tar nghal a ni bawk a ni. Zofate Chawlhbuk hi hun remchang hmasa bera MZP chuan sak a tum a ni.

‘Zofate chawlhbuk’ sakna tur hmunah hian function tawi neih a ni a he huna thusawitu MZP General Secretary Pu L.Ramdinliana Renthlei chuan,“Zofate Chawlhbuk sak a nih theih nana phal taka ram min pe tu Pu Ch. Chhunga(L) Ex-Chief Minister Mizoram te chhungkaw chunga MZP chuan thinlung takin lawmthu kan sawi tak meuh meuh a ni. MZP chuan kan pi leh puten an thlah kal zel turte tana lu chhum ban chum huama chenna atana an lo sah zauh tawh leh an lo enkawl tawhte tun dinhmuna mi ram ang hiala ngaih a lo ni ta leh, neih let leh theih loh ang hiala pilbo hret hret chu pawi kan ti a, hemi chungchanga thangtharte leh Zoram mipuite kaihharh leh thudik hriattir a, chawhnuna a awm leh theih nan Zofate Chawlhbuk hi sak kan tum a ni”. a ti a.

MZP General Secretary Pu L. Ramdinliana Renthlei chuan Zofate chawlhbuk chu hlawhtling taka sak a nih theih nan Mizoram mipui zawng zawng te thlawpna a ngen thu a sawi bawk a ni. He huna hian Pu Michael Zonuntluanga MZP Finance Secretary leh Zofate Chawlhbuk sakna tur hmun phalna pe tu Pu Ch. Chhunga(L) Ex-Chief Minister te chhungkaw aiawhin Pu Lalnuntluanga chuan thu a sawi bawk a ni.